قالو الحاج البشير والله راك حطيتني في موقف صعيب ،بصح هادو سنين ماشفت منك عيب ،استأمنتك على مالي وشيي وكنت فحل وولد اصل وراني قابل نجي معاك تطلب لحلال لي يحبو ربي.بعدها خبرو حسان بالطفلة اللي بغاها وباركها الحاج البشير المعلم ديالو.
كما تفاهمو قصدو أهل الطفلة .حسان هدر مع الأخ الأكبر تاع يامنة ولي رحب بيه وما عارضش لانو يعرف ماعندو ش حياة أخرى من غير خدمتو في المخبزة .وخاطيه مشاكل . اما الحاج البشير قصد والديامنة وتحدث معاه بخصوص نية حسان الخباز في خطبة يامنة .
الاب بحث على عايلة حسان وكامل لي سقساهم قالولو ماعندوش اهل . الاب رفض يزوجو يامنة .بعثلو جواب مع وليدو البكر قالو يسمحلي حسان لكن مايهنيني خاطري نزوج بنتي لانسان مانعرف اصلو من فصلو .اذا كانو والديك متوفيين الله يرحمهم. بصح جيب ولد عمك وليد خالك جدك المهم واحد من العائلة والبنت راهي ليك. راك وليت وليد الحومة وماشفناش منك عيب. كانت هذه العقبة اللي حرمت حسان من الارتباط بيامنة وقعد يخدم في المخبزة وكي يخلاص وقت الخدمة يروح لشاطئ البحر هناك كون علاقات جديدة مع الصيادين واللي لقاولو خدمة في الميناء .
اما يامنة ولات حبيسة الدار لاتية مع الشغل والطياب .تخدم على مرت باباها وخاوتها الذكور. تستنا في مكتوبها وقلبها متعلق بحسان اللي قطعت منو الياس.
غادر حسان المخبزة وهديك الحومة بالرغم من انو قلبو مازال متعلق بيامنة لكن كان عليه يبدل المراح بالاك يتهنى ويستراح ..بدا يخدم في خدمتو الجديدة يخدم ليلة وحدة ويقعد يومين .في هادوك اليومين كان يخدم مع الصيادين يخدم ليل ونهار. وقدر يكري دار وبدات احوالو المادية تتيسر .واحد النهار وهو يبيع كي العادة جا اخو يامنة يشري عليه الحوت تعرف عليه حسان وسلم عليه ..واش راك واش راهي العايلة واش راهي الحومة ،قالو الحمد لله كلش مازال كما خليتو برك الوالد توفى والدايم الله .اقرأ الجزء الثالث على الرابط https://yasmi.net/2022/%d8%ad%d9%83%d8%a7%d9%8a%d8%a9-%d9%8a%d8%a7%d9%85%d9%86%d8%a9-%d9%85%d9%86-%d8%b6%d8%ad%d8%a7%d9%8a%d8%a7-%d8%a7%d9%84%d8%b2%d9%88%d8%a7%d8%ac-%d8%a7%d9%84%d8%b9%d8%b1%d9%81%d9%8a-%d8%a7%d9%84%d8%ac/?amp
يتبع
